陳偉霆（William）日前以彩藍撞橙紅的造型示人，配上古銅膚色，既型且Sharp。這次由設計師陳刀，為男模特兒打造好「色」帥哥。
撞色及鮮色衫不再是女生專利，男生都可以撞得出「色」。早前William頭戴草帽、身穿彩藍色恤衫、橙紅色四個骨褲及波鞋，以Sharp爆造型接受電台訪問。陳刀大讚William穿得出色：「着得好睇，擺明撞Tone，加上佢本身夠高大，又有古銅膚色，充滿陽光感覺，可塑性好高。」
草帽大熱
陳刀為男模特兒Christopher炮製不同造型，而他最滿意是Smart Casual：「個色撞得好好，本身佢夠高夠瘦，可以Carry唔同顏色嘅衫，其實男仔可以大膽啲，玩吓唔同顏色，我覺得鮮橙撞灰、彩藍撞紅都OK，但唔好鮮紅撞黃或橙。」陳刀認為草帽是今年大熱之選，男生不妨考慮配襯。
陳刀：「灰色唔係Sharp爆顏色，但都撞得有層次。古巨基最近都以呢個Look主持節目，呢個打扮以Slim Cut為主，唔好有墊膊或褲褶，否則會似酒樓部長。」
陳刀Profile
土炮時裝設計師，畢業於香港理工大學，03年舉行首個個人時裝展。曾擔任樂隊野仔、女歌手麥家瑜的形象服裝指導，早前「升呢」出書做作家。