黑氣纏身的Stephy近日確診豬流感，成為首宗香港藝人確診個案，慘！但她於確診前明知助手中招仍不戴口罩出席活動，因此惹來不少網友怒插她沒有公德心，連不少曾與她同場的藝人都議論紛紛，甚至自我隔離確保他人安全！Stephy雖然被千夫所指，幸得「蜜友」方力申為她解圍，連日來為她大講好說話！

方力申昨日為新片《機器俠》陪Fans睇戲谷宣傳時，為防自己曾與Stephy接觸而引起恐慌，自動自覺繼續戴上口罩，明顯不欲招人話柄。談到Stephy被指發燒仍沒有戴口罩出席活動，被指冇公德，他即替對方澄清：「我打過電話畀佢，佢話自己好委屈，因為出席活動時佢只係感到喉嚨痛同好似發燒，仲未探熱同確診。其實好多藝人平時都為咗工作帶病上陣，唔通次次都戴口罩咩？」方力申更憐香惜玉地表示Stephy已經好慘，希望大家給予愛心：「其實佢好不幸o架喇！冇咗兩個禮拜搵錢機會。」

傅穎：畀我實戴口罩

而正在家中自我隔離的Stephy，昨日透過唱片公司解釋不戴口罩的原因：「其實成件事發生得好快，當日已經同記者講唔舒服，仲第一時間去睇醫生Check清楚，依家已經接近康復，唔使食藥，但會把握機會盡量休息，呢個星期尾會復工，為新碟錄音。」

Stephy「宿敵」傅穎（Theresa）昨日出席奧海城活動擔任評判，期間有Cosplay參賽者甫上台即除口罩，卻被另一評判指：「你估你係Stephy呀？」Theresa席間表示已發SMS慰問Stephy，希望她早日康復，對於她不戴口罩惹非議，Theresa說：「藝人做嘢上台好難戴口罩，相信佢唔知自己有事，如果知應該會戴口罩！」她又表示不方便評論Stephy是否意識不足，但強調換轉是自己，就一定會戴！她坦言得悉同事確診後已到診所檢查，證實只是鼻水倒流，沒有發燒及喉嚨痛。

而同公司的森美對於Stephy引起大恐慌，即大發偉論：「睇吓邊個病就知道Stephy同邊個拍拖，可能方力申就算病咗都唔敢認！」