夏日炎炎，最佳的消暑方法當然是游水！郭穎橋日前趁陽光普照到泳池，不過她並非游水，而是為泳客服務，由清洗泳池到抹地板等一腳踢，確保設施高清（高度清潔）！
每到夏日，郭穎橋（阿橋）都會密密游水消暑，不過日前她作出新嘗試，客串到酒店游泳池做工作人員：「平時去泳池發覺啲水咁乾淨，都知道係啲工作人員嘅努力成果，所以今日我親身體驗吓佢哋嘅工作！」這天她帶齊裝備，準時到泳池開工，第一步是將泳池內的垃圾撈走，一見池中異物，她即挺直腰板拋出巨網，怎料她大嗌：「好重呀！」雖然雞手鴨腳的她弄得滿地池水，最後仍完成工作，抵讚！
清潔泳池後，阿橋埋首擦地板及太陽椅等設施，然後到清潔部摺疊已消毒的毛巾，最後放在枱面讓客人享用。雖然在猛烈陽光底下，阿橋做到滿頭大汗，但她仍保持笑容，態度認真一流！清潔過後，阿橋為免客人被濕滑的地面滑倒，快快將「小心地滑」的牌搬到池邊，相當細心！
撈過界做園丁
完成工作後，阿橋拖着疲憊的身軀離開泳池，不過當她見到用來淋花的水喉又即活躍起來，即開水喉淋花，還高呼：「嘩！好好玩呀！」連花王的工作都做埋！親身體驗泳池清潔工作後，阿橋不禁要向泳池工作人員致敬：「佢哋要喺烈日當空下做咁多粗重工夫，一定好辛苦喇！全靠佢哋，泳客先可以享用咁清嘅池水咋！多謝佢哋呀！」
工作苦與樂
最快樂
貪玩的阿橋最愛淋花，因為慳力又透心涼：「淋花唔使點用力，而且攞住條喉周圍射嗰種感覺好得意，所以就算我做晒要做嘅嘢，都淋埋花先走！」
最辛苦
阿橋不諱言最辛苦是撈垃圾：「因為嗰條柄係金屬做，畀太陽曬完之後好熱，直頭『辣』手！而且撈上嚟嗰吓好重，要用盡全力先掂！」