近日o靚模界鬧出不少是非,不過性格樂觀的「廚房妹」劉婷婷卻未驚過。談及節目的三位主持,婷婷坦言與單身的方力申零交流,反而對名草有主的鄭中基甚有興趣!
曾參加「美少女廚神」的劉婷婷,除了煮得一手好菜外,更是一名滑水高手,她透露每逢夏天都會在西貢或大埔的海灘滑水:「唔可以話係高手,我只係學咗一、兩年!依家只係做到用右、左轉板180度嘅動作,其他嘅仍然跟朋友學緊!」
炎炎夏天,她除了滑水消暑外,還愛到海灘游水:「我平日都鍾意游水、跳舞同唱歌。(怕曬?)都驚㗎!所以事前會做足防曬措施,夏天用得最多錢就係買防曬同泳衣!」問到可曾在沙灘被男生搭訕,她笑說:「又唔會咁大膽行埋嚟,最多都係眼望望啫!」
望合作拍戲放笑彈
最近o靚模界鬧出很多是非,但婷婷卻抱着樂觀心態面對:「會當新聞咁睇,唔會特別擔心,因為是非都係新聞嘅一種!」她表示拍攝《美女廚房》與小方零交流,並自爆較愛鄭中基:「可能方力申驚再畀人話!所以當日冇交流。其實我好欣賞鄭中基,覺得佢搞笑好出色,希望將來有機會合作。(想拍戲?)都想,我唔介意扮醜女,最重要係大家睇得開心,不過呢啲要等公司安排。」
出盡法寶突圍
歷年以「廚房妹」旗號入行的女生多不勝數,眾人為突圍而出,都出盡法寶令觀眾留下印象!
胡心諾(Rainbow)—靠緋聞
Rainbow完成第一集《美女廚房》錄影後,即有報道指她被方力申以SMS攻勢力追,令她迅即成為追訪對象。
鍾蕙芝(Lavina)—靠身材
Lavina擁有34E的驕人身材,無論為《美女廚房》拍攝外景還是廠景,均以低胸裝上陣,令人有無限遐想。
裴殷(A. Lin)—靠後台
A. Lin打着「周秀娜師妹」旗號入行,曾跟陳寶珠及關智斌等演出舞台劇及電影,憑清純外表獲邀主持節目及做模特兒。
Profile
中文名 :劉婷婷
英文名 :Toby Lau
出生日期 :3月8日
年齡 :25歲
體重 :108磅
三圍 :33B、25、34
演出經驗 :三花奶電視廣告、Smartone台灣電視廣告、《美女廚房》No.37「美少女廚神」