呂方去年與鄭裕玲分手後，感情一直冇着落，但兩個月前在呂有慧作媒下，與年約三十歲的「嫩版嘟嘟」火速撻着。日前呂方與女友拍拖後管接管送，駕駛舊愛嘟嘟所贈的座駕送新歡返香閨。嘟嘟聞呂方蜜運中，透過助手回應：「祝福佢哋！」
呂方自去年十月與相戀十六年的鄭裕玲甩拖後，期間雖傳二人復合，但呂方卻否認，並坦言二人復合無望。回復單身的呂方連月來形單影隻，直至兩個月前經好友呂有慧介紹，與年約三十多歲、身形如嘟嘟般高挑，家住跑馬地豪宅的「嫩版嘟嘟」火速撻着。據知，呂方與「嫩版嘟嘟」在聚會上認識，二人互有好感，未幾已發展戀情。
與女友人晚膳
日前記者發現與「嫩版嘟嘟」熱戀中的呂方，與女性友人外出時亦保持距離，免得惹來女友呷醋。當晚他與一名長髮女子在中環晚膳後，女伴還陪着煙癮大發的呂方在街頭抽煙，期間兩人有傾有講，但呂方對她似乎興趣不大，還手指指叫她自行搭車，然後會合數名男友人再往消遣。
反觀於上周六，呂方相約一身悉心打扮、露長腿的「嫩版嘟嘟」在中環密會醫肚時，他更駕駛着舊愛嘟嘟昔日所贈的座駕，擔任柴可夫司機管接管送，兩人相聚至十一時許，呂方才接載女友返回位於跑馬地的豪宅寓所後，自己才直駛返回最近租住的大坑台。據呂方身邊友人透露，他對此段情甚為保護，曾受情傷的他更要待戀情穩定後才會公開。
呂有慧做媒人
記者事後聯絡上呂方，問到是否蜜運，他說：「我冇拍拖！（見你對女友管接管送？）只係朋友嚟！依家全副心機放晒喺工作，唔會再咁輕易拍拖，因為受過傷害。」而舊愛嘟嘟被問到呂方已蜜運，她透過助手回應：「祝福佢哋，希望佢哋樣樣都好。」身為紅娘的呂有慧說：「我係幫佢做媒人，我只可以講個女仔係單身，三十幾歲，有正當職業，佢哋個幾兩個月前認識。我同呂方一直有聯絡，知佢同嘟嘟分手後唔開心，咪搞好多聚會介紹女仔佢識囉！（呂方謝媒未？）咁又未。」
文、攝：追蹤組