最近Kay新聞不絕，繼與陳奕迅（Eason）傳緋聞後，前晚她與張敬軒擔任《中學生聯校歌唱大賽2009-SUPERnova》表演嘉賓，並上台為參賽學生打氣，但台下卻有一名男觀眾兩度高呼：「唔好走音！」Kay聞言即尷尬地說：「好啦！好啦！」但台下另一名女觀眾又高叫：「收皮啦！」被殺個措手不及的Kay呆在當場，最後只好裝作聽不見，並投入演出，因Kay患感冒令聲音變得沙啞，故演出時有點不夠氣。

會再注意健康

Kay抵達前曾表示因病不接受訪問，但演出後卻主動表示願意受訪，對於有觀眾喝倒采，Kay稱只聽到一個：「第一次聽到呢啲『好心』提示，無論佢出於好意定惡意，我諗現場觀眾好支持我！」但她亦坦言感到不開心：「好突然，同埋本身我個肺同氣管唔好，容易受感染，要再注意吓！」對於近日負面新聞纏身，Kay無奈地指世上不會所有人都喜歡自己，只要問心無愧便可。

「喊係因為災民」

另外，有傳Kay在賑災活動上被禁與Eason碰面而灑淚，Kay說：「有關同Eason嘅新聞我冇嘢回應，我係睇到開幕時啲災民搞到家破人亡好淒涼先喊，我冇喺後台喊！」而Kay的老公張繼聰錄影無綫節目時則說：「冇睇報道，係寫嘅人主觀意願，我嗰晚都有同Eason打招呼，不過太忙冇傾偈。（老婆眼淺？）我估佢喊都係因為啲災民！」