英皇一哥古巨基、鄭希怡（Yumiko）、鍾舒漫（Sherman）、周家蔚、高鈞賢及羅天宇等，昨日赴澳門出席文藝匯演記者會，適逢基仔生日，大會為他炮製驚喜派對，除了切蛋糕外，吳雨還叫Yumiko及Sherman向壽星仔獻吻，惟兩人神情尷尬，最後只肯隔空錫面，非常搞笑，Yumiko事後表示因搽了唇膏，擔心弄污基仔面龐才冇真咀。

基仔咬着蛋糕上的卡通肖像牌。	鄭希怡為免唇膏甩色，只願隔空咀壽星仔。	放大圖片

問基仔生日有何節目，他說：「我生日向來低調，好少慶祝，尋日同朋友食咗飯慶祝。」問到女友有否送賀禮？他即詐傻說：「我有好多朋友，佢哋有問我想要乜，但我叫佢哋唔好送，將啲錢捐去台灣賑災仲有意義，歌迷會都有捐款。」他又指因為工作問題，本月抽不到時間與歌迷慶祝，而緋聞女友Lorraine昨日亦未見蹤影。

周家蔚證洪金寶健康

談到生日願望，基仔希望台灣災民早日脫離苦海，自己身體健康，問到何時結婚？他說：「我仲細，未諗過。（今年幾歲？）千禧年之後嘅20歲。（幾多歲結？）25歲先。」談到徐淑敏閃電結婚，他說：「我就唔會，冇咁嘅計劃。（平時好安全？）吓，你講緊搭車定搭船？我平時都有戴安全……帶。」

此外，有指洪金寶早前入院，周家蔚會與洪天明拉埋天窗沖喜，周家蔚否認：「沖喜係作出嚟！洪金寶身體好好，已經復工。」她表示並不心急結婚：「因為父母婚姻有問題，所以我對婚姻有恐懼，不過都會結婚。」