曾志偉「貴人事忙」,無論出席活動或者私人聚會都「例遲」,閒閒哋遲到粒零鐘不在話下,有時更加索性唔到!當大家都習以為常嘅時候,原來都有一個人治得到佢呢種壞習慣,嗰個人就係梅小惠嘞!好似嗰日志偉出席新書慶功宴,小惠見佢未到就打電話去催,點知好快佢就蒲頭,可謂打破慣例,難怪小惠即刻露出一個得戚嘅表情啦!
小 惠:我哋真係做嘢吖嘛!志偉不嬲都唔呃我嘅。
小小So:你幫志偉做嘢?
小 惠:我哋成立咗間公司,負責推出獎門人嘅Product,遲啲仲會推出辣辣壽司添,好快又再有新書面世嘞!
小小So:點解有咁嘅構思?
小 惠:獎門人咁受歡迎,但一直都冇副產品,我覺得唔好嘥嘛!
小小So:唔做幕前?
小 惠:做,我仲係全職Artist,不過淨係一年做一個騷囉!哈哈……依家唔使化妝,皮膚好咗好多,都見得吓人啩?但係今日唔好影我相呀!
小小So:身邊有冇「好嘢」呀?唔拍拖嘞?
小 惠:好忙,邊有時間? 陣間又要
……(下刪數十字)
睇嚟如果要飲小惠嘅喜酒,真係仲有排等呀。