兩場《Summer Pop Live in HK》前晚結束，兩場出席歌手共逾八十位，惟有不少歌手卻是抱恙演出，與黎明合唱的Janice Man就負傷上陣，她說：「我前晚喺屋企練舞，點知右腳踢到梳化櫈腳，我以為冇事就繼續，但跳跳吓Feel到拖鞋濕咗，原來隻腳趾尾流緊血，仲有半塊趾甲甩咗出嚟！」雖然十「趾」痛歸心，但Janice堅持和黎明合唱兼伴舞，且穿着四吋高跟鞋上陣，她說：「我貼咗膠布，又用紗布包紮好先上台！」對於未來「老闆娘」樂基兒快將生日，Janice揚言會花心思送贈禮物。

千嬅催黎明結婚

楊千嬅則哮喘病發兼喉嚨生繭，心口及背部更因敏感而生滿粒粒，問緋聞男友丁子高會否心痛？她說：「最心痛係父母！」千嬅前晚因聲沙Cut掉兩首歌，但新歌《真命天子》卻獲大會安排多名穿着婚紗的舞蹈員伴舞，問到是否代表其待嫁的心情，千嬅笑說：「咁真係要多謝公司苦心經營，你估租禮服唔使錢呀？」

追問其「真命天子」是否丁子高，路過的千嬅老闆插口說：「真命天子係隻馬！」千嬅喪笑後說：「應該畀黎明，催佢結婚！真命天子？呢個世界冇一定嘅Guarantee（保證）喎！」談及好友陳奕迅與謝安琪傳緋聞，千嬅力撐陳奕迅會珍惜屋企人。

鍾舒漫與鄧麗欣(右圖)的青春打扮，配合Summer的主題。	鄧麗欣	劉美君因哮喘病發兼氣管炎，要不停飲水。

孫耀威默認戀情

另外，草蜢在音樂會上勁歌熱舞，掀起全場高潮，但蘇志威卻因左腳韌帶撕裂而撐着拐杖現身，台上的他亦毫不錫身左扭右擰，事後他說：「其實都唔係幾爽，我只係上半身郁，下半身冇得跳！」而劉美君哮喘病發兼氣管炎，而前一晚又錄製賑災主題歌以至睡眠不足，聲音沙啞。

此外，孫耀威亦聲帶出血，加上進食不潔沙律以致食物中毒而發燒，他被問到與前女生宿舍成員陳美詩同居傳聞，Eric雖否認同居，但沒有否認戀情：「出咗新聞後我哋有通電話夾口供，感情低調啲好，因為唔想引起兩邊公司有任何誤會，我哋係一齊玩嘅教友！」

文：音樂組

攝：黎志輝、唐豁莊