遊戲節目《大咕窿》的比堅尼女郎「蛋蛋」陳宛蔚，07年參選港姐入行，雖然人氣不及o靚模，但勝在口齒伶俐及身材平均，所以不乏演出機會，上位指日可待！
陳宛蔚（Calinda）07年參選香港小姐，雖未能當選，但加入TVB後亦不乏演出機會，除擔任「味之天使」及拍劇外，她又在遊戲節目《大咕窿》中擔任火辣辣的比堅尼女郎，曝光率大增！她說：「我覺得好開心，多啲曝光可以加深觀眾對我嘅印象，工作量亦會多啲！」
豁出去演妓女
原來她參選港姐時，才首次穿比堅尼示人，對於在外國讀書的她來說，令人有點驚訝：「我唔鍾意着咁少布畀人望嘅感覺，依家都係工作需要先着，我諗做完《大咕窿》之後，唔會再成日着㗎喇！」對於o靚模打扮性感，Calinda大讚她們勇氣可嘉：「佢哋都幾大勇氣，但我覺得人人做嘢嘅Standard（標準）唔同，可能佢哋接受到，但o靚模熱潮都係時候停喇！已經開始有啲Over咗，再咁落去，會影響年輕一代！」
港姐出身的她，原來最喜歡拍劇：「因為每次做嘅角色都唔同，可以有好多嘗試，有幾次要扮妓女，初時有啲介意，但讀過藝員訓練班之後，我知道為咗角色好，要學識放低自己，咩角色都盡力做！」
港姐質素哈哈哈
應屆港姐的候選佳麗被指質素平平，問到Calinda對她們有何評價，她暗笑說：「雖然冇正式見過晒咁多個，但覺得質素都……哈哈！可能佢哋化妝經驗唔夠，唔識表現自己最靚嘅一面啫！而且選港姐仲要睇好多嘢，包括臨場表現、學歷同Interpersonal Skill等，所以要睇埋呢幾方面先評價！」
Profile
姓 名：陳宛蔚（Calinda）
年 齡：26
三 圍：32B、23、35
入行經過：07年參選《香港小姐》
演出經驗： 《大咕窿》、《味分高下》、《王老虎搶親》