將於今晚舉行的《8.8水災關愛行動》，前晚在電視城錄製主題曲，譚詠麟（阿倫）、鍾鎮濤、張智霖、泳兒以及不少亞視、有線藝員等均有現身，其中剛剛出席完《Summer Pop Live》的容祖兒亦及時趕到，甚有善心。

發起人曾志偉在錄影前，先向一眾藝人訓話：「為表尊重，服裝顏色統一做白色，冇着白色衫嘅，問服裝部借，低胸嘅要換衫，除墨鏡，唔好戴帽同摺衫袖。至於正式當日最好着藍色牛仔褲，大會會派T恤，唔好剪爛嚟着！」由於不少藝人到場才得悉服飾要求，故場面頗尷尬，其中「Laughing哥」謝天華被志偉當眾點名叫他除褸埋位，他顯得頗為不悅，更黑面Fing褸，身穿黑衫到場的阿倫則解釋：「我着件黑衫嚟，以為悼念吖嘛！」其後他亦有換上白色長袖衫。至於低胸到場的羽翹則辯稱：「件衫都唔係好低胸啫！我唔係專登，有需要我會換咗佢。」而戴帽到場的吳卓羲及鍾鎮濤等亦有聽勸告除帽，鍾鎮濤笑說：「好在仲有頭髮！」

天華被點名要求除褸後，面帶不悅。	放大圖片	羽翹（右）連環犯規，戴帽之餘，Tee的領口亦過低。

側田豁免脫帽

至於前晚因事缺席的側田，據知今晚將會出席籌款，志偉被問到側田是否也要除帽以示尊重？他說：「呢個係佢獨有造型，我哋會尊重，唔通人哋戴假髮都要除咩！」