何韻詩前晚穿短裙露長腿出席音樂會，平日甚少着裙的她即惹起哄動，阿詩說：「黐線，大驚小怪！（少着裙嘛？）冇乜特別，呢個話題係咁講都幾抵。」將於下月舉行演唱會的她透露，穿裙是配合個唱主題：「因為主題係講超能力，加上咁多年都想轉吓，點知引起咁大關注。」問到近日是否購入很多短裙？阿詩哈哈笑說：「唔係，次次都係着呢條，但次次都有咁嘅效果。」近日忙於拍劇的她表示瘦了幾磅，對於得到同劇的汪明荃大讚演技很好，阿詩說：「係咩？我都想做演員。（好辛苦o架？）做歌手都辛苦o架啦！都係日接夜、夜接日。」