昨日是二千金李晞兒（Hayley）的三滿月，李家在六星級四季酒店大搞百日宴，宴請一眾城中名人為晞兒送上祝福。07年底，李家誠和子淇為大女晞彤舉行一連兩日的百日宴，成為城中佳話，今次晞兒百日宴不只花費不菲，上下兩場宴會更洋溢童話色彩，可謂費盡心思，估計百日宴豪花逾千萬（詳見附表）。
肥肥白白重15磅
佩戴千萬首飾的子淇穿上一襲黃色低胸晚裝，雍容華貴，她下午偕李家誠接受傳媒訪問時說：「因為大女個宴會似大人派對，今次細女嘅就小朋友啲，以童話形式作主題。」談到花費多少時，他們強調錢不是最重要，反而是放了許多心機和時間在這個宴會。再為人父的李家誠更欣喜地透露B女肥肥白白，三個月大已重15磅。問到晞兒像誰？子淇說：「似爹哋多啲，兩個女都似晒爹哋！」在旁的李家誠即說：「對眼比較似我！」
深情咀嘴晒幸福
兩口子又表示不會只偏心細女，無論生幾多個，一早已協議會公平對待，但當談到囡囡「愛黐」誰時，子淇即醋意大發：「兩個都唔黐我，淨係黐爹哋，爹哋一返嚟就攬住佢，希望下一個跟我多啲！依家大女都有少少妒忌，不過佢都會行去妹妹度，但講聲Hello就算！」對於四叔指大女觀音托世，子淇表示細女沒有特別，兩個女都是旅行時製造！
傳四叔催生慈姑椗，子淇不敢怠慢，她更定了下一輪生B計劃，問會否追仔時，李家誠說：「盡量啦！都要抖一年，等子淇身體復原先。」問子淇會否感到壓力？她說：「有壓力都冇辦法，有啲人計日子，有啲人話食嘢，盡跟啦，生仔定生女都係講緣分！總之依家目標係生4個先。」問李家誠如何感激子淇？子淇即搶答：「唔使感激啦！生呢兩個女就係The best thing happened to us！」
訪問完畢，記者要求二人錫錫，起初李家誠欲拒還迎說：「呢啲嘢屋企先做！」但在再三要求下，子淇即錫了老公面頰一啖，現場有攝影記者笑謂拍不到，二人即時深情一吻！
腳頭好帶旺經濟
至於李兆基昨晚約七時到達會場，提到長孫晞彤是觀音托世，問到晞兒是甚麼托世時，他說﹕「觀音托世唔係我講，係風水師講。（晞兒腳頭好﹖）應該好，經濟都復甦。（想要追孫仔﹖）希望晞彤晞兒可以帶兩、三個弟弟嚟，咁就合家歡。（子淇話生四個﹖）兩個加三個咪五個，佢之前都係三年抱兩。（有冇生仔秘方﹖）有好多人傳畀我，連外國都有，我全部畀晒家誠睇。」
問到送了甚麼給晞兒時，四叔笑言樣樣有，不過，今次不會分花紅給員工，他解釋﹕「唔關仔女問題，上次都係女，只係金融風暴銀紙唔好亂使。（今晚你埋單﹖）冇所謂，我埋又得，阿誠埋又得。」