數數手指，00年入行的黃宗澤（Bosco）已在圈中打滾9年，多年來專注拍劇的他，由當初在《創世紀》和《婚前昏後》中飾演保鏢及男妓的角色躍升為現時無綫一線小生，05年更憑《我的野蠻奶奶》奪得「飛躍進步男藝員」獎，直至最近在《烈火雄心3》中穩佔重要角色，當中的毅力絕對不容忽視。在演藝上取得一定成績，去年他開始進軍樂壇推出個人專輯，未知是否會以林峯的發展作目標？他說：「我唔敢奢望自己可以好似佢咁開Concert，因為我都未Ready好，記得當初樂小姐叫我去試音嘅時候仲以為講笑，到真係做到歌手同出唱片之後，都覺得好似發咗一場夢，仲點敢咁快諗去紅館開Concert吖！畀心機做好下隻唱片先啦！」
望電影圈發圍
對於未來發展動向，Bosco希望嘗試在電影方面有所突破：「雖然之前都有拍過電影，但係始終都係少接觸，想睇吓會唔會有多啲機會囉！我咩角色都唔介意做，無論奸呀、醜呀，都唔介意，總之有得發揮就得！」談到做歌手和拍電影，Bosco仍是表現得戰戰兢兢，但當提及專長時，擅長演戲的他即滔滔不絕：「我畀咗好多心機去拍《烈火3》，真係拍得好辛苦！天氣又熱又焗，我哋都付出咗好多汗水同努力，有好多危險動作都係自己做番。雖然係好辛苦，我都希望我嘅努力係有人留意到囉！」
冇同杏兒分手
工作上，Bosco可以說得很有目標，很有幹勁，但講到感情事，他即時變得好像「軟皮蛇」一樣，答得拖泥帶水，開口埋口都是「隨緣啦！」、「到時先算啦！」、「冇諗咁多喎！」等Model Answer。提到與胡杏兒一段疑幻似真的感情，他說：「都冇拍過拖，我唔明點解會話我哋分手，不過呢啲都係傳媒寫，習慣晒又唔會好大反應，又唔會覺得唔開心，呢 啲都唔到我去控制。」問到有否想過甚麼時候結婚？他說：「真係冇諗過幾時喎！細個拍拖可能會諗住要同對方結婚，但係個人愈大就反而冇咩諗結婚，覺得同對方溝通到最緊要，不過都未搵到啱嘅對象，到時先算啦！依家仲有排儲錢，起碼賺到七位數字先諗結婚啦！」
講大話有破碇
Bosco在娛樂圈打滾多年，雖然對感情問題已有特定答案，不過仍是有破綻，當記者問到他入行後拍拖次數時，他本想回答，但想了一想後欲言又止：「唔……入行後呀……唔……你呢個問題……哈哈……好難答喎！」這個答案足以令人知道他入行後的戀事別有玄機了！