近年唱片市道慘被盜版、非法上下載搞到冇啖好食,令各大唱片公司頭都痛埋,講到明出一張就蝕一張,同十幾廿年前,張學友、梅艷芳、張國榮同譚詠麟咁,單係首批定單都至少十幾廿萬張,真係冇得比,依家各大唱片公司惟有出盡法寶希望有新突破。
即將舉行演唱會嘅何韻詩同小小So傾開偈,話依家單靠傳媒報道係唔夠,所以透過唔同渠道宣傳,佢又話網絡世界係最好嘅宣傳地方,仲即時開佢個個人網誌畀小小So睇,入面放咗唔少新歌MV花絮相,話愈多人睇到就愈好。
小小So都要讚佢有腦同勤力,因為佢呢排好忙,要拍劇、籌備演唱會同為新碟做歌,但佢仲肯為宣傳新歌犧牲瞓覺時間,日日喺Blog度上載新相,所以話紅係有原因嘅。