最近是非多多的尹蓁晞（Yumi）最近客串做便利店員，體驗另一種工作，雖然她以熱褲上陣，不過並沒特權，經理要她試盡不同工作崗位，包括收銀、搬貨、上架，甚至掃地都要一腳踢！Yumi直言最花工夫，莫過於要進入又凍又窄的冷藏庫補給飲品，令身穿熱褲的她凍到起雞皮：「平時買嘢飲就多，估唔到店員嘅工作咁辛苦！冷藏庫咁逼，啲嘢飲仲好重添！」

有索爆店員Yumi收銀，顧客絡繹不絕。	Yumi不慎推跌水樽，狼狽又瘀爆，只有無助地「呀呀」大叫！	自言在家中會幫手打掃的Yumi，掃地時亦有板有眼。

帶挈生意大增

走出冷藏庫，Yumi將蒸餾水上架，卻不小心撞跌水樽，她即時「呀！」一聲大叫出來，惹來顧客側目，Yumi惟有快快手將水樽搬回原位，卻發現當中幾支已被撞爛，認真雞手鴨腳！不過，近日人氣急升的Yumi令便利店生意大增，不少粉絲見她在場，都專誠幫襯，經理亦讚她好腳頭。

Yumi邊抹汗邊清潔微波爐，雙手冇時停！	每朝第一件工作，當然是整理新鮮出爐的報紙。	Yumi要檢查食品的賞味期限，確保不會過期。

完成一天工作後，Yumi說：「我讀書時做過Part-time Sales，賣衫吸塵咩都要做，已經覺得好辛苦，不過原來喺便利店做仲辛苦！又要收銀又要搬貨同上架，如果返夜晚仲要驚有人打劫，真係唔易做㗎！」