張文慈與杜德偉前女友Bibe，昨日出席在黃埔新天地舉行的《健力士單車極high激jump》活動，張文慈被安排坐在斜板台上，而Bibe則躺在路中，兩人化身「路障」，眼看單車在她們的頭頂和身上飛過，險象環生，幸有驚無險！

低胸的Bibe躺在路上，讓單車在身上飛過！

放大圖片

張文慈表示甚少玩單車，曾考慮考電單車牌，但擔心發生意外刮花雙腳，結果打消念頭。對於候選亞姐質素差，她力撐亞姐質素好過港姐：「我19號會做評判，到時睇吓先知！（內地佳麗會唔會好啲？）內地同香港都有靚女，可以拉高質素。（有啲候選亞姐連唇毛都冇剃？）咁犀利！我建議佢哋剃晒手毛腳毛先去見評判，唇毛都唔剃，唔係咁好。（有個仲有大牙罅？）少數人啫！當然有好質素，有唔好質素啦！（有乜貼士畀佳麗？）樣要清啲同着衫要靚啲，要騷到自己青春活力一面，仲有眼緣係好重要，笑容甜美當然加分。」

陳倩揚着重內在美

另外，港姐陳倩揚昨日出席活動時，被問到候選亞姐質素差，她說：「唔好咁講啦！有時選美唔一定講外表，內涵同修養都好重要，對人歡容啲，畀佢哋有多啲進步空間。（白韻琴話今年港姐係『友誼小姐』質素喎？）即係話我啫！我都係友誼小姐。」