日前黃秋生出席有份主演的電影《LAUGHING GOR之 節》首映，因未獲安排座位而大發雷霆，拂袖而去。前晚他與樂易玲及導演邱禮濤相約在圓方先食意大利菜再睇戲，期間秋生與樂易玲言談甚歡，看來已經冰釋前嫌！心情大靚的秋生說：「樂小姐知道我想睇戲，但首映嗰晚睇唔到，所以咪約我出嚟請我睇囉！咁啱邱禮濤呢晚請食飯，咪順理成章約埋一齊食飯兼睇戲。（唔再嬲？）樂小姐咁忙都抽時間請我睇戲，仲嬲乜吖！最緊要套戲反應好，觀眾鍾意。」
此外，樂易玲昨日接受查小欣電台節目訪問，她說：「套戲首日票房106萬，做咗暑假檔港片開畫首日票房冠軍，後日會慶功，無綫會繼續同邵氏合作開戲。（秋生日前冇位睇首映喎！）我同佢睇番啦！我仲恭喜佢做咗C1，佢睇完戲好開心，話會盡量配合之後嘅宣傳。」