英國樂隊Keane首張大碟《Hopes And Fears》於04年賣個滿堂紅，前晚終於首次來港開騷，吸引音樂人Eric Kwok及其女友葉佩雯、周柏豪、黃偉文及黃耀明捧場。Keane的樂隊特色以鍵琴為主打，前晚主音Tom破格彈結他演繹多首新歌，如《The Lovers Are Losing》及令全場High翻天的《Spiralling》，亦大唱多首舊作如《Everybody's Changing》及《This Is The Last Time》等。

落台親近歌迷

Fans反應非常熱烈，企足全場，不時拍手及大合唱，令Tom大為感動，並嘗試說廣東話「多謝」答謝歌迷，可惜未能成功，他笑言廣東話十分難學。全晚Tom落力表演，出場不久便唱至T恤全濕。除了玩電結他外，他亦用木結他獨唱《Your Eyes Open》，聽得Fans如癡如醉。

而Keane主腦之一的鍵琴手Tim Rice-Oxley亦心情興奮，邊彈邊Fing身。為報答Fans，Tom更一度下台與Fans作近距離接觸，遭Fans摸頭亦不介意。最後Keane被Fans的熱情融化，兩度安歌共唱了20首歌益Fans，其後Tom更賣口乖說：「我知道你哋等咗好耐，我承諾大家一定在不久將來再返嚟。第二次安歌只係送畀你哋咋！」

文：外娛組