係人都知甄子丹同太太汪詩詩好鬼恩愛，早排子丹生日，詩詩為佢搞咗個神秘生日派對，小小So都係座上客。詩詩話為咗呢個派對，事前忙咗3個星期，不過最辛苦係唔畀得老公知：「我向來心直口快，好難對老公守得住秘密！經過今次，我諗再冇下次喇！」
不過，當晚現場好多傳媒早已聞風而至，詩詩好擔心個秘密會穿煲，所以佢好醒咁叫咗子丹嘅助手同傳媒預先講聲，叫大家唔好拆穿，所以最後成功畀到驚喜子丹！小小So睇到當晚除咗有生日蛋糕外，仲有龍蝦食，詩詩話：「因為子丹喺波士頓長大，佢好鍾意食龍蝦！而且每年我生日，佢都會煮龍蝦畀我食，所以今次我畀番驚喜佢囉！」