隨着七小福追隨師傅遠征美國受挫後，多位師兄弟被迫流落異鄉。元泰坦言流落初期的生活十分徬徨：「當時我哋有廿幾人留低，仲要借住朋友嘅Apartment，一住就廿幾日，不過為咗生活，我哋有能力嗰啲都出去搵嘢做。」　

誤打誤撞致富

由於銀彈欠奉，兼且人生路不熟，逆境求存的師兄弟，自力更生的日子相當難捱；原本對前景無甚方向的元泰，也是在誤打誤撞中踏上成功之路，想不到一做便三十年，可幸是發展比預期中理想。

元泰重新喚起記憶說：「初初喺羅省打工，呢個星期搵完錢，下個禮拜又使晒，之後轉咗去德州打工，機緣巧合下，有次去墨西哥旅行，見到個海好靚，嗰度又多魚，我咪問我老婆搬去海邊附近住好唔好囉！搬咗去住之後，我就拎咗萬幾蚊積蓄出嚟搞餐館，估唔到之後就一直係咁開，78至79年仲開咗5、6間分店添！其實初初我會喺嗰度開餐館，只係諗住教啲外國人食中餐咋！」

由最初拿着一個魚網、一支捕魚叉、幾包米便草草開檔賣魚粥，發展到目前在美國及加拿大均擁有分店的元泰笑言，轉做飲食業能發展得如此順利，全靠從七小福的生活中得到啟發：「當年我哋出Trip盡量會食好啲，因為平時食得太差，我就係抱住食嘢要過得到自己呢個宗旨做飲食嘞！」

學會逆境求存

雖然元泰在美國的發展，與師傅的理念背道而馳，不過師傅及師母對他還是無限支持：「當我餐館嘅生意穩定咗之後，師母間中有嚟幫襯，次次我都會下廚煮嘢畀佢食。」

未知是否從事飲食業的關係，當年身手不凡的元泰，現時已是一個頂着大肚腩的生意人，不過他學藝時所散發的光芒，還是叫師弟十分難忘。與元泰手足情深的元彬笑說：「二師兄最擅長就係打拳，就算唔使打鑼打鼓，佢啲拳腳聲都大聲到全場觀眾都可以聽到。」

作為二師兄，元泰仍在港時經常協助大師兄洪金寶（三毛）一些管理工作，自流落異鄉後，這重責幾全落在三毛身上，幸好三毛甚有大哥風範，各方面均井井有條，最令人心悅誠服的，是肯為一眾師弟妹承擔的性格，不過要照顧幾十人的馬騮兵團，確是「大佬唔易做」，有苦自知……