無綫製作的《LAUGHING GOR之變節》，前晚在圓坊舉行首映禮，竟然令主角之一的秋生滿肚怒火！以白馬王子Look到場的秋生，獲安排左拖呂慧儀、右攬周美欣行紅地氈，享盡溫柔鄉的他更激讚兩位美人！除此之外，曾於07年與秋生傳緋聞的張詩敏（Jessie）亦與星城娛樂公司的工作人員撐場，更鬼祟避傳媒，未有與秋生合照，該友人只表示與Jessie特意來捧秋生場。秋生獲稀客捧場理應開心，但入場不夠十分鐘便見他怒氣沖沖離場，面露不悅，拂袖而去！

樂易玲主動慰問

記者見狀即上前問個究竟？他即怒插大會說：「唉！有位都冇位坐呀！連主要演員都冇位，直情變咗大茄！」問到是否開玩笑時，火遮眼的他即說：「睇我個樣唔嬲咩？入到戲院企咗好耐，戇居居咁！（向陳志雲反映？）反乜映啫！唔識搞就唔好搞啦！」秋生突然火爆離場，無綫方面表示只屬誤會，外事部副總監曾醒明說：「入面預咗位喎！有人招呼佢㗎！可能佢唔坐啫！」樂易玲表示得知事件後已致電秋生：「佢話走係因為有啲嘢做，當時我忙於招呼唔知個情況，其實大會有安排VIP同演員位嘅，可能帶位個員工未即時安排，佢又以為冇安排先走咗，佢個樣惡啲先以為佢嬲啫！」

一班無綫藝員響應扮蠱惑仔行動，齊齊着黑衫及戴金鏈。	楊思琦未有跟隨着黑衫，反以低胸裙搶風頭。	周美欣影壇初試啼聲，好友王君馨（右）以大露背贈興！

志偉嘲搵藉口走

記者及後再致電秋生，其怒火明顯降溫，他說：「唔只我冇位坐，仲見到好多Sponsor代表冇位！啲PR又唔敢叫人起身，有啲位冇人坐又話要留，都唔知搞乜！跟住叫我坐第一行，我覺得唔好，但曾志偉又肯坐喎！（收到道歉電話？）樂小姐打過畀我講唔好意思，話接待嘅員工比較新，仲話再約我出嚟睇過！」他希望無綫能吸取今次經驗，搞好日後的電影活動。對於秋生炮轟無綫安排失當，昨日出席宣傳活動的曾志偉笑說：「佢不嬲都係大茄啦！有聽佢講過話冇位，佢答我都唔係話發脾氣，只係約咗人趕住走，佢搵藉口走啫！」對於白韻琴彈《獎門人》食Wasabi及戲弄藝員十分白癡，志偉反寸對方落伍：「佢好少睇喇！Wasabi都已經係十年前嘅嘢，仲攞嚟講？」

佘詩曼揚言有意進軍影壇，不介意與鄭嘉穎演情侶。	林峯與樂易玲齊撐天華（中），令他感激不已。	有份演出的葉翠翠與黃德斌齊齊盛裝出席。

另外，主角謝天華以一身黑色打扮出席，他笑言心情如同結婚，問到對票房可有信心？他說：「睇完優先場知道反應好好，所以好有信心。」同場撐天華的佘詩曼表示有意拍電影，不介意與鄭嘉穎拍愛情片。