「咪睇元華年紀細，食煙放火乜都齊」；不說不知，在《功夫》中他與元秋是歡喜冤家，現實中也是不折不扣的歡喜冤家，動拳動腳甚至出武器，你來我往打個落花流水。

打交打到拉上警署

且聽聽元華怎樣細細道來：「嗰次同元秋出埠，都唔記得爭乜嘢，佢起勢咁打我，我嗰時燙緊衫，就順手用個熨斗擋佢！」元秋於前文曾提及他倆是爭用一個衣架，連箇中細節亦忘了，證明元華當時是何等怒火沖天！

元華的打架個案總是停不了，還記得七小福每次出街都會被人叫「光頭仔」，他總是沉不住氣飽以老拳教訓，鬧上差館自不在話下，他笑說：「啲警察都同我哋熟晒啦！」

相信是最嚴重的一次應算是「斬手指」，說來也是活該！原來元華煲蠟差點燒光學院儲物室。回想起這段驚心動魄的險事，元華猶有餘悸地說：「有次我喺學校煲蠟，總之乜嘢可以着火嘅嘢都放晒入去，最後一加水呀……啲火起到收唔住，差啲燒晒成個儲物室，師傅嬲到話要斬我手指，不過斬嗰時佢其實係做樣嘅，特登做到好大動作等我有準備，當佢攞起把刀斬落嚟嗰一刻我就即刻縮手，佢斬我唔到就推開我，放我一馬。」

接濟三毛白狗當災

受過斬手指之險，仍不足以令元華變乖。極度硬頸的元華任師傅怎打怎罵，始終不肯戒煙，他說：「嗰時真係可以唔食飯，但唔可以唔食煙，好多師兄弟都偷偷食，咁我當然食埋一份啦！到滿約之前嗰幾年直頭唔理喇！呢頭師傅打完嗰頭又食，心諗都就嚟滿師啦！你打得我幾耐吖！」

雖然元華是頂級百厭星，卻極受師兄弟歡迎，皆因為人最講義氣，最經典是當年洪金寶（三毛）偷走，元華捱義氣隱瞞行蹤，更為三毛送飯送棉被，結果被師傅重打70藤，即時登上「藤條榜」首位。

元華重情重義，自然贏得師兄弟間的愛戴，原來元華的觔斗一樣深得同門讚賞。本來所有男女七小福，均能打得一手好觔斗，卻何以人人談起元華的觔斗，都有讚冇彈呢？卻何以他能贏得「觔斗王」美譽呢？卻何以連李小龍都垂以青眼呢？哈！真係有古講喇……