元彪常用「走私」貨

可是，元彪卻自言並非富家弟子，只是父母眼中的寶貝，他說：「其實係我父母錫我啫！知道學校飯餸唔好，佢哋就送飯嚟學校畀我，制水嗰排人人都冇水用，但係我就日日都有熱水沖涼，呢啲都係我父母每日送嚟學校畀我嘅！」除了必需品之外，元彪父母還擔心兒子生活苦悶，經常偷偷「走私」玩具進學校，讓兒子可於完成一天艱苦的訓練後，能有鬆弛神經的玩樂時光。

元彪在貧困的環境中得天獨厚，得到父母的照顧，在七小福中可說是資源最充足的一個，地位有如亂世英雄，自然人人爭相巴結。重提當日情景他亦不禁會心微笑起來：「嗰陣時有好多師兄弟都會私下結拜㗎！不過係邊個有嘢食就同邊個結拜，但係一冇嘢食嘅時候就會斷絕關係，到有嘢食嘅時候又會再結拜。」

玩飛鏢誤傷成龍

除了有嘢齊齊食之外，元彪亦奉行有嘢齊齊玩的政策，每晚都會和師兄弟分享父母帶來的玩具，不過這群貪玩的小朋友總會玩到樂極忘形，意外頻生呢！嚴重者更會釀成「血案」，元彪說：「有次我父母新買咗支飛鏢畀我，咁我哋幾師兄弟就一齊玩，大家輪流擲，成龍又心急喎！我擲飛鏢嘅時候佢就喺個靶前等我支飛鏢，點知我嗰次『撻Q』飛中咗成龍個嘴。」

除了食好嘢玩靚玩具，元彪亦會「入鄉隨俗」和師兄弟齊齊支持環保，將垃圾改裝成刺激好玩的玩具，他說：「我就最鍾意執啲爛遮返嚟，將佢啲骨拆晒出嚟造弓箭，好好玩㗎！」

元彪玩飛鏢誤傷成龍，在七小福的反斗事件中，簡直「閒過立秋」，更嚴重的個案還多的是，在每「劑」大單嘢中均能榜上有名的，並非元彪，亦非成龍，更非洪金寶，還有誰如此膽大妄為……不就是曾自以為是Peter Pan，一飛沖天變直墮十八層樓的元華是也！