不時與Angelababy隔空傳情的陳偉霆（William），昨日出席《美心冰皮Cool住你．型住拍．網上短片大Click賞》活動，獲三位性感「冰Baby」相伴，令他尷尬萬分，不但笑容僵硬，合照時更刻意一本正經，與「冰Baby」保持距離！

問到較喜歡哪位「Baby」，William說：「我鍾意月餅多啲！」記者笑言要告知Angelababy，他即求饒大叫：「唔好呀！」場面搞笑！他坦言被「Baby」夾擊而感尷尬：「成個活動都好尷尬，佢哋代表唔同口味話『食我啦』，好緊張！（怕Baby呷醋？）唔怕。」他表示往年沒有送月餅到Baby家，若今年有贊助便會送大禮，並自爆曾見家長。

望中秋陪家人

另外，William自爆玩燈籠曾「火燒連環船」，驚動消防員：「畀阿媽鬧足成年，今年中秋希望唔使工作，可以陪屋企人。（同Baby曬月光？）唔喇！留番畀屋企人。（請佢去你屋企？）唔喇！佢都有屋企人，但如果佢嚟都歡迎。」問到會否拍拖追月，他即耍太極說：「可能都要開工。」