郭富城緋聞女友熊黛林（Lynn）來港發展短短幾年，雖然人氣爆燈，但就冇因為身價飆升而忘本，仲好錫媽咪添！之前Lynn出席公開活動時，話媽咪近排嚟咗香港，仲話永遠將媽咪放喺第一位，小小So收到風知道Lynn近期成日陪住老媽子，連城城都懶得理，有次小小So喺銅鑼灣撞到Lynn拖住媽咪行街Shopping！
嗰日Lynn以T恤牛仔短褲示人，雖然冇化妝，但皮膚依然咁有光澤，所以好多途人都對佢眼甘甘，不過眼中只有阿媽嘅佢，唔知係咪驚媽咪蕩失路，兩母女十指緊扣行街。享受家庭樂嘅Lynn，仲帶媽咪去好出名嘅雲南米線食晚餐，雖然小小So有一刻疑問，諗緊Lynn點解會唔理名模身份去食平民餐，不過當小小So跟實佢哋兩母女入去醫肚時，就發現原來嗰間米線的確好好食，當Lynn入去時仲好Nice咁同店員打招呼，證明佢一早已經係常客，Lynn點兩碗米線，店員仲益多碟菜畀佢，靚女真係特別多着數喇！