元秋在中國戲劇學院學藝時，師傅規定一班徒弟每隔一段時間，便要集體做二百下「旋子」。由於秋姐是旋子高手，其他師兄弟姊妹便將「旋子重任」交託她身上，令自覺「世上無難事」的秋姐亦忍不住大呼救命：「嗰時佢哋個個都叫我包底，譬如佢哋夾埋做到一百下嘅，我就要做埋其餘嗰啲，咁樣好攰(口架)嘛！所以我成日都要逐個求佢哋做多一、兩下，等我唔使咁辛苦。」

大忙人一日走幾場

縱然「捱得又打得」令秋姐吃盡苦頭，不過做人「抵得諗」卻非損失，反而往往有所得着，正如離開戲劇學院後發展機會接踵而來，便是最佳明證。當年邵氏有些大製作，秋姐均有份參演，雖不是擔正，但起碼日日有工開，而且更是不少當家花旦背後的「得力助手」。

秋姐仍記憶猶新地說：「其實我都算好彩嘅，嗰時有個師兄喺邵氏度做武指，阿爸又係做呢行，佢咪推薦啲人用我囉！話我啲觔斗打得夠飄喎！」

「有麝自然香」，秋姐踏足戲棚之初，不但毫不怯場，而且導演安排她做女主角替身，由半空跳下的高難度動作她都照做如儀，成功令她得到不少導演的信任及重用。秋姐又說：「嗰時我幫過凌波同埋何莉莉做替身，一個由我幫手揸槍，一個由我幫手耍劍，次次係咁意換個頭飾就上場，所以當年有個花名叫『影后（後）』。」

飲水思源自願獻金

雖然年紀輕輕便嶄露頭角，但秋姐飲水思源，並未忘卻師傅養育及教誨之恩，當年日薪高達150元的元秋，第一年所賺的片酬，全數奉獻給師傅，而且還是心甘情願。

秋姐說：「我哋有個傳統，就係出嚟做嘢頭一年，所有人工都要交畀師傅，呢個傳統叫幫師，即係好似依家嘅謝師宴咁，嗰時人工都唔錯，有成150蚊一日，我全部都交晒畀師傅。」

就是因為這個影「後」聽教聽話又好使好用，即使秋姐完成幫師後，師傅還是偶爾會找她回荔園表演，而且人工還相當不錯，對她來說，這絕對是師傅對她的肯定。她說：「正式離開學院之後，師傅每個星期六都會叫我返荔園幫手做一日戲，每個月人工有成350蚊，當時師傅咁需要錢都肯畀錢我使，令我覺得好開心囉！」

女七小福中，元秋是一個成功例子；男七小福中，除成龍、洪金寶之外，元彪也是光芒四射的小師弟。本身是少爺仔的元彪，卻未有因而練精學懶，一樣刻苦練功，更曾慘烈到被迫親睹師弟「吃屎」，可真是驚心動魄，烙印永難磨滅……