本文重點
八模兵團成員A.Lin曾傳出整容，但昨日有讀者傳來A. Lin舊照指她整容，她請記者可任摸臉龐，力證無添加！而八模兵團昨日出席動漫活動時，因攤位太擠擁，惟有跟日前的周秀娜臨時腰斬活動！鑑於前日發生非禮事件，昨日各活動都加強保安！
本報昨日收到讀者電郵一批A.Lin的舊照，指她曾整容外，當中更有與男女朋友一起大玩睡衣派對的照片，她昨天表示已多次就此事多次解釋：「啲睡衣派對相，係兩年前同班舊同學慶祝聖誕節，啲相我唔覺得有問題。我從來冇削骨，只係塊面瘦咗。」
至於被指割了雙眼皮的A.Lin，對此感到十分好笑，她說：「我依家都仲黐緊雙眼皮膠紙，都冇整過。如果我真係靚咗，真係要多謝化妝師，不過我都好矛盾，靚咗係開心，但係又畀人話係整容。」她更即場叫記者可隨便摸她的眼和鼻，以證明自己冇整容！
擔心Fans被博懵
由於前日Melody（陳若嵐）在動漫節被非禮，昨日各o靚模活動明顯加強保安。對於之前在另一攤位現身的A.Lin及Anjaylia，被問到會否擔心被非禮時，A. Lin說：「有啲女Fans被男Fans壓住，一路影相，我一路擔心。我叫同事照顧佢，但唔知佢有冇畀人博懵！」兩人之前出席Mimo攤位活動時，有五至六位保安跟身，更稱已打足底兼雙手護胸。
而八模兵團其中六模A.Lin、Anjaylia、DaDa、Crystal、Hailey C.和Isabel等，昨日原本現身動漫節攤位，但因攤位逼滿動漫迷，令大會在活動前約一小時腰斬活動！六模由約四名保安及工作人員包圍下，經特別通道進入會場，在大舞台後台附近的洗手間前做訪問。各人穿上印有其肖像的背心，內穿背心打底。對於不能近距離接觸Fans，六模大感失望。八模推出的攬枕中，以A.Lin及Anjaylia最好賣，每款攬枕日售十個，動漫期間更設免費送貨，但她們不會親自送上門。問到DaDa會否叫緋聞男友羅天宇買，她避忌地說：「我叫晒四葉草嘅人買。」