最近o靚模一窩蜂湧現，少女為求上位不惜「一脫求名」，令o靚模原意變質，難怪身為「o靚界女神」的Angelababy亦要由o靚模變「潮模」：「以前畀人叫o靚模冇所謂，但依家就唔想畀人咁叫，因為意思已經變咗。」反o靚模熱潮如火如荼，她淡然表示不怕受影響，因為自己不屬於o靚模，至於為甚麼有人會掀起「反o靚潮」，她說：「唔係好清楚，可能依家啲報道話佢哋太性感，影響到真係想睇書嘅人。」
有苦自己知
的確，她是有意擺脫o靚模行列，以前她深愛鬈曲的金髮，現已改為深啡色的直髮；以前心直口快的她，現已多了謹慎及認真：「如果話我紅得快，我覺得依家啲（o靚模）仲快，有唔少女仔可能對我或者做模特兒行業有憧憬，但我可以講有苦自己知，你睇我成日飛嚟飛去好似好容易，但我每月要買幾多時裝雜誌吸收新知識，同埋我要花幾多錢去買衫出席活動，又有幾多人知？」
問她對有意加入o靚模界的少女有何勸戒，她說：「如果自己有美好身材，唔介意嘅絕對可以展露出嚟；相反係好保守嘅，就唔好受人影響，最緊要忠於自己，做番自己。」
二字頭的改變
繼《Love Angelababy》後，今年Angelababy再次推出個人寫真《Miss Angelababy》，不論風格或形象，是想告訴讀者「Baby已經長大了」。她說：「上年仲係一字頭，可以玩多啲青春同可愛嘅造型，今年已經踏入二字，想畀大家感覺到我已經成長咗，形象可以大個啲。」這次拍攝地方力Sell巴黎，再起用星級幕後班底，整體製作費豪花近百萬，非常落重本，難怪再度拍攝寫真的她亦同樣緊張又興奮，她說：「第一次去巴黎影寫真，我都帶咗兩篋衫，造型都有成3、40個，主題分別有電影、黑白照同Life Style，我比較鍾意Life Style，因為入面嘅我最自然。」當整個行程完結時，她又回復貪玩又純真的個性：「最難忘係慶功嗰晚，飲咗一啖白酒就醉咗，後來先知醉咗嘅我不停咁跳舞，都幾搞笑。」
何謂「模」？
Baby：「解作為專業模特兒，要好似Mikki同熊黛林咁有好身形、身高同經驗，至稱得上模特兒。」
Chrissie：「由細到大都想做，係好多女仔夢想中嘅職業，對我嚟講『模』係很靚嘅感覺，雖然我冇5呎10吋高，行唔到巴黎嗰啲大騷做模特兒，但好幸運依家都做到相關嘅工作。」