周秀娜今個暑假成為百萬吸金o靚模，前日在動漫節推出人形攬枕，由於每日限量發售20個，在短時間已被搶購一空，風頭一時無兩！當她賺到笑之際，拍賣網站竟發現有不法商人睇準「商機」，在未經版權同意下自製一批印有其三點式肖像的老翻咕，並以「平價」99元發售，Chrissie經理人揚言希望大家尊重知識產權，又表示保留法律追究權利。

該批「老翻」咕分兩款，其中一款是Chrissie在詩琳廣告內的造型照，另一款則是她俯身拋胸Look，網上賣家「jmaghk」在網上將老翻貨定價為99元，更揚言客人可自選相片及提供長形款式，擺明與原裝598元的「正貨」搶生意，但截至昨晚七時仍乏人問價。此外，Chrissie早前推出的寫真集連性感潮Tee限售Boxset亦在網上掀炒風，由原價328元炒至700元。

樂與「山寨廠」合作

昨日Chrissie經理人Roy對於被人推出老翻咕，他說：「我哋攞齊有關資料會考慮追究，保留法律追究權利。」他亦不怕貨比貨：「我哋設計師擺咗好多心血去做呢個攬枕，呢個係一個翻版天堂，希望喺天堂嘅人忍下手，生意難做。」他又笑言歡迎與「山寨廠」合作：「我哋好歡迎同唔同嘅單位合作，佢哋做翻版不如做正版。（寫真Boxset炒到700蚊？）唔鼓勵呢個風氣，希望大家好好珍藏。」而Chrissie昨日的「正版」攬枕在動漫節繼續熱賣，攤位早已賣清，並出現逾百定單預購，反應理想。