台灣名模林志玲認真好命水，憑住樣靚、身材正成為台灣第一名模，之後向電影圈發展，處女作就擔正荷里活大導演吳宇森嘅《赤壁》女主角，跟住又同歌壇一哥周杰倫合作拍戲，事業咁順風順水，真係恨死好多人！小小So識林志玲好多年，記得以前佢好友善，見到佢同記者做訪問時真係有問必答，而且來者不拒。
但之前小小So被邀請去台灣參加一個首飾騷，見到林志玲，本來諗住難得見到佢可以慢慢同佢傾吓近況，點知一見佢出場已經不得了，被傳媒包到差啲連個樣都見唔到，佢做完大圍訪問，已經被身邊助手阻止唔可以再親近佢。聽講林志玲嗰次做嘉賓收咗唔少酬勞，咁當然要幫個牌子做多幾個訪問，所以完騷後，佢仲留喺度。
小小So見到好多嚟自中、港、台嘅記者都等緊佢，做完一小部分後，點知佢個助手好唔耐煩，不停要大會停止，話林志玲唔再接受訪問，搞到有間電視台一路等問林志玲，點知等咗好耐最後都做唔到，小小So都戥佢無奈，即時覺得做佢身邊嘅人真係妹仔大過主人婆。林志玲都未出聲，助手已經幫佢擋晒，如果到時被人話佢大牌，就要反省吓身邊啲人嘅態度先。