不過,日夜受罰卻沒有令成龍變乖乖仔,反而學藝時的頑皮事迹卻是停不了。
成龍多年來所拍的是動作電影,所演的都是諧趣搞笑角色,天生佻脫好玩的性格數十年如一。要數成龍學藝時的頑皮史,多到十隻手指也數不完。天不怕地不怕,連師傅也不怕的他,怕甚麼來!就連祖師爺佛像都要玩,確是膽大包天。可惜胡亂舞弄祖師爺佛像,卻為他帶來連串黑仔事件。
搞佛像禍事連連
前文已曾提及「反斗星」元華亂搞祖師爺佛像,結果惹出禍事,而後果只得一個,自然是十藤、廿藤、幾十藤的打呀打!師兄弟手足情深,所謂有難同當,也許成龍不想元華獨自孭起整隻黑鑊,竟自爆搞祖師爺佛像,他亦是黑手之一。
且聽成龍娓娓道來:「有次同元華玩祖師爺佛像,佢抆鬚我就用掃把掃佢。嘩!玩完之後嗰排就黑仔喇!有晚喺台上面做戲,唔知點解一轉身就叉錯腳跌落台;第二日做戲,背脊支旗又無啦啦掛埋條牛仔褲出場;之後有日做包公,面掛一把鬚,又神推鬼擁咁掛多把鬚喺腰帶度;之後仲有一單,我哋每日都要練倒立,通常都會搵張枱頂一頂慳番啲力,點知張枱突然冧咗落嚟,責住我隻手,手掌都斷埋,不過都好,因為傷咗隻手就唔使練功。」
成龍硬食大死貓
除了玩祖師爺佛像惹來禍事之外,黑仔事件還陸續有來……原來他亦曾捲入偷窺風波,不過至今他仍高呼冤枉:「嗰次真係冤枉!我去廁所嘅時候見到元奎喺度裝嚟裝去,行埋去睇真啲原來佢喺度緊人沖涼,咁啱佢跣一跣腳,就畀人發現,點知佢走得好快,啲人過到嚟就得番我一個喺度,以為我裝人沖涼,係咁就食咗隻大死貓。」更乖乖不得了的……原來沖涼的竟是師母,不過當師母出來時,各人已作鳥獸散,元兇當然逃之夭夭!
每天總是捱打、練功、演戲,任誰都會悶出鳥來!苦中作樂,七小福的童年時代,甚麼希奇古怪的搗蛋玩意,可說無日無之。不過學藝與玩樂的不知不覺間,他們的基本功卻是練得無比堅實,所以自出師門之後,這班「元乜元物」都相繼打出名堂,偏偏有「元樓」不用的成龍,卻有着一番迂迴曲折的星光大道……