二○○八年亞洲電視以網上投票嘅新方式，由廣大民眾投選心目中嘅亞洲小姐，小小So覺得新制度未得預期效果，反而搞出一場令亞視蒙羞嘅鬧劇，要組成獨立調查委員會徹查。花咗幾個月時間調查，賽果始終維持不變，有「內地票后」之稱嘅王譽霖眼白白被搶走寶座。眨眼間《2009亞洲小姐競選》又再招募，王譽霖經過差唔多一年已經想通想透，唔再為選票執着。
小小So：亞視依家有冇跟你聯絡？
王譽霖：冇，佢哋唔會主動聯絡我哋。
小小So：賽果冇變，你有冇失望？
王譽霖：失望當然有，之前好多人都在關注亞姐嘅事態發展，依家賽果不變，我信相亞姐已冇公信性。
小小So：有冇同內地佳麗聯絡？會唔會採取抗議行動？
王譽霖：冇聯絡喇！大家各有各工作，只喺新年期間互相恭賀，間中喺網上撞見囉！我哋唔會有乜嘢行動。
小小So：係咪時間耐咗，心情已經平復？
王譽霖：老實講，我依家仲係嬲，但時間長咗，唔會好似以前咁作過分嘅批評。