胡杏兒與黃宗澤（Bosco）的緋聞始於2005年，早前盛傳杏兒難忍男方花心兼冇錢，一怒之下連人帶狗趕出家門，但日前出席電視劇《烈火雄心3》的宣傳活動時，監製王心慰又踢爆兩人仍然是一對，到底她的感情生活如何？杏兒說：「同圈中人拍拖好煩，要用好多氣力避狗仔隊，真係好攰！寧願到時發生先算，真係好攰，唔會因為要拍拖而拍拖，依家都想搵個長久啲，等緣分囉！」

杏兒表示享受暗戀的曖昧及患得患失的感覺。

感情生活空白的杏兒透露，認識新朋友後，會不期然幻想對方很好。

收視爆燈的《烈火3》中，杏兒與鄭嘉穎飾演關係曖昧的好友，明明有意卻開不了口，兩人合唱片尾曲《有意》，正好描寫這種知己情人的曖昧感覺，杏兒說：「我覺得好浪漫！感情最好玩就係暗戀，好似好曖昧咁，估吓估吓先最有Surprise，我享受暗戀幻得幻失嘅感覺。」自言感情生活空白的她，沒有暗戀對象，但自爆有「自製戀情」的習慣：「有時候識到新朋友，可能會有『呢個人都幾好』嘅幻想，喺腦海閃過一下。」

怕靚仔唔識珍惜

杏兒坦言幻想男友的條件首要是靚仔，但現實生活對靚仔Say No：「太靚仔有危機感，而且太靚仔嘅人好多嘢好容易就得到，會唔識珍惜。」還未來得及開口問她指的「靚仔」是否Bosco，杏兒已笑着說：「好在我從來都冇Bad Experience！」

後記：讚鄭嘉穎就得人

杏兒笑言未與鄭嘉穎合作前，認為對方是冷酷型：「我以為佢官仔骨骨唔睬人，好緊張自己形象嗰啲，點知有次同佢去做健康快車嘅探訪，先發現佢係個好Care-free嘅人，好鍾意食嘢，仲會夾餸畀全枱人食。之後合作《舞動奇跡》，會互相遷就同照顧對方，大家喺嗰時經歷咗好多！」問到有否幻想過嘉穎？杏兒笑住搖搖頭說：「太熟，但識耐咗先覺得，佢真係靚仔喎！」