黎明在新片《十月圍城》中飾演一名流浪漢，後得鼓勵改變一生，這位鼓勵他的角色，正是由過往與他合作無間的李嘉欣演出。昨日電影在上海拍煞科戲，李嘉欣穿上紅色中國服示人，扮演傾國傾城的大美人。問到片中與黎明的一段情，她大賣關子表示留待劇組透露：「戲中改變咗黎明一生，一個女人能夠改變男人一生，令佢活出骨氣同尊嚴，呢個角色點會唔吸引？」問到今次演出是否復出第一炮，她笑說：「從來冇話過退休，何來復出？監製陳可辛以前搵過我拍呢部戲，但當時冇開拍。估唔到十年後佢仲記得我，咁難得有呢個機會，我就一口答應！」她指看劇本後相當感動，並說：「睇到個場景時忍唔住喊，令我相信愛情能夠穿越生死！」

避談「造人」問題

婚後首度拍片，問到是否得到丈夫批准，李嘉欣說：「得到先生嘅支持同尊重，先生同我向來都好民主，工作方面我係好獨立嘅人，我嘅決定佢都會支持。我話有黎明同陳可辛，佢話幾好，仲話可以敍吓舊。」當問到是否正努力造人為許家添丁，她卻大耍太極表示要尊重劇組，不想回應私人問題。

另外，陳可辛透露拍攝過程困難，加上時間緊迫，幸得劉偉強導演相助，遂送上片中使用的古董港幣予對方以示感激。

文：影視組