黃貫中（Paul）及黃家強前晚帶樂迷回到未紅時，搖滾紅館「天台」舞台，阿Paul說：「我哋就係咁起步，好有親切感。」而家強則多謝歌迷支持：「好開心今日同阿Paul有呢個聚會，我哋三個人可以走到咁遠全靠你哋！」又出動黃家駒的結他笑說：「除咗呢支，佢仲留咗好多結他畀我，其中我最珍惜係佢唔肯送畀我，要我用二千蚊買嗰支！」在全場呼叫「家駒」時，家強又調皮的說：「覺得佢今日嚟咗，你望吓隔籬。」
另外，首晚個唱兩人請來台灣組合五月天擔任嘉賓，而家強太太與囝囝及阿Paul女友朱茵則在台下力撐，阿Paul除踢拖在Encore時現身，唱出《In the Name of Rock》時，更兩度豎起中指。在唱出歌詞「那萬人迷，走音走爆咪」的《醒你》時，兩人笑說：「呢首歌送畀鍾意食糖嘅人！」未知是否有意暗寸早前來港開騷被指咪嘴的棒棒堂。
