可能在七小福心目中，師傅也曾是一個這樣的人，不過隨着年紀日漸長大、視野日益擴闊，他們開始發現看似鐵石心腸的師傅，原來也有柔情一面。就以伙食為例，雖然他們曾投訴伙食乏味又單調，但其實每一粒米飯、每一棵菜、每一條貓魚的背後，都夾雜着師傅疼愛徒兒而辛苦淌下的血汗。

元彬難忘恩深義厚

當年對師傅甚為懼怕、每次遠遠見到師傅行近便會掉頭走的元彬，就是因為無意間知道師傅如何不問收穫的付出，及至長大後對師傅更加尊敬、更見孝心，也是師兄弟姊妹中，最積極籌備50周年慶祝活動的一個。

元彬說：「依家諗番起，真係覺得師傅好偉大，佢為乜要養我哋啫！其實當年嘅生活都好艱難，有次我聽教我哋功夫嘅呂師傅講，師傅湊大我哋其實好辛苦……好辛苦……嗰時師傅為咗賺錢養家，成日要孭住個大竹籮，跟住由油麻地一路行到去尖沙咀，一邊行一邊拮起地上面嘅菜葉放入個竹籮度，等遲啲拎去賣。嗰時一籮菜葉大概可以賣到兩毫半子，然後師傅就會將啲錢交畀師母，用嚟加餸畀我哋。」

外表嚴肅內裏頑皮

于師傅除了口硬心軟外，也是外表嚴肅、內裏頑皮的表表者。由於經營戲劇研究學院頗為艱難，即使徒弟已在荔園表演賺錢幫補，但要養活為數六、七十人的馬騮團也絕非易事，為了減輕經濟負擔，于師傅不時要用奇招「騙取」贊助，不過，當然這一切全是出於善意。

元彬又笑說：「師傅好狡猾(口架)！因為嗰陣時一套戲服好貴，要成幾千蚊，所以師傅有時會搵啲比較有錢嘅七小福屋企人津貼戲服。我最記得有次師傅打畀元彪嘅屋企人，話佢終於做到主角，跟住就氹佢啲屋企人畀錢做衫，佢屋企人畀咗錢做衫之餘，仲特登包咗幾行飛，諗住同啲親戚朋友一齊捧個仔場，點知去到睇嚟睇去都睇唔到元彪，後尾先知原來個主角根本係另一個人，好搞笑！」

徒弟向來對師傅敬若神明，而師兄弟姊妹之間亦相親相愛，仍在演藝圈的固然感情深厚，即使已離開的也時有聯絡，可是人有悲歡離合，月有陰晴圓缺，有些師兄弟多年來芳蹤杳然，際此五十周年紀念活動，能不令人更惹懷念……