甫出道即與周杰倫（Jay）拍廣告的Sevara，入行近四年機會不絕，她開心地說︰「我好開心做模特兒呢份工，記得05年啱啱嚟香港，就有機會同Jay拍一個護膚品廣告，嗰時都唔知佢係邊個，後來先知佢原來好出名，嗰次都係我第一次拍廣告，足足拍咗18個鐘，雖然好攰，不過真係好興奮，話晒第一次拍廣告呀嘛！」

讚Angelababy靚女

近期嫩模掀起城市話題，不過也是嫩模年紀的Sevara卻說︰「我冇介意呢樣嘢，反而開心咁早出道，因為呢行幫我快速成長，同埋身邊合作嘅人都比我大，佢哋教我好多嘢！至於依家嘅嫩模，佢哋都好甜好可愛，我最鍾意Angelababy，佢真係好靚女。」

Sevara第一次拍廣告，就是與Jay合作。 資料圖片	Severa希望將來開餐廳及有自家的時裝品牌。	身材均勻的Sevara，擁有令人羨慕的長腿。

被封為「翻版Amanda S.」的Sevara不諱言經常被人錯認，幸好正版全不介意，Sevara說︰「好多攝影師同化妝師都咁覺得，有時我同Amanda一齊做嘢，我哋仲會開玩笑周圍同人講，我哋係Twins。有時啲客見到我啲相，都以為係Amanda，好搞笑。我好尊重Amanda，佢係一個性格好好而且好聰明嘅模特兒。」

談到未來，才21歲的Severa眼仔睩睩地說︰「我好想去多啲唔同嘅國家、想有自己嘅時裝系列、想有自己嘅餐廳……」認真多諗頭。

拍橙汁廣告飲到驚

做模特兒人前靚靚，人後卻辛酸，早前Sevara到台灣拍攝一個橙汁廣告，廣告入面，Sevara好享受「歎」橙汁，不過為求完美，一個鏡頭拍足幾十個Take，她要狂飲幾十支橙汁，結果拍完，超愛飲橙汁的Sevara都叫怕怕，連橙味都驚，不過見到廣告拍得靚，無論多辛苦，Sevara都覺得值得。