今屆書展可謂係寫真廝殺，皆因新舊(o靚)模爭住推出性感寫真，想自己本寫真集大賣真係要諗計，好似Kama（羅凱珊）唔單止頻頻曝光谷人氣，更擇定好日子去祈福，祈求寫真大賣，點知人算不如天算！
Kama同小小So話早幾日見陽光燦爛，特登由九龍塘坐港鐵去大埔，諗住去大埔轉的士入林村棵許願樹祈福，慳番好多的士錢咁話。搭車沿途風和日麗，佢不之幾開心，點知落車搭的士去許願樹之際，望一望個天有大大舊烏雲，開車冇耐就傾盆大雨，仲大雨到佢一落的士就整濕雙腳，Kama好冇癮咁話：「想許願都許唔到，惟有嘆句無緣啦！」小小So安慰佢話咪咁唔開心，佢諗咗一陣就自我安慰咁話：「啲人話貴人出門招風雨，加上水為財，落咁多雨，都係好意頭嘅。」係囉，做人真係要識得自我開解，否則容乜易一日唔開心幾廿次！