本文重點
外表斯文的林一峰，原來最愛的消閒活動是踩單車，他更曾與一眾單車發燒友於夜半奔馳。此外，他透露於德國踩單車期間曾誤闖天體湖，令他尷尬不已。
文：音樂組
單車，可說是林一峰生命的一部分，他踩單車至今已有20年歷史：「細個住九龍，約12歲開始，每逢星期六、日，我都瞞住父母去沙田公園租單車踩，之後搬咗去大埔，更加攞正牌日日踩單車！由屋企踩到去大美督水壩，來回一小時，踩到搬走，維持咗5年。」
夜半逍遙遊
長大後的一峰並沒有放棄他最愛的玩意：「我買咗架摺得埋嘅單車，成日約埋班單車友，半夜喺香港島踩單車！喺夜深人靜時候，沿住電車路踩，感覺好逍遙！希望香港政府快啲喺鬧市加設單車徑，畀單車發燒友喺安全嘅情況下踩單車，其實歐洲好多先進城市都有單車徑畀市民！」
幾乎踩勻全港的一峰，到外國旅行亦不忘「至愛」：「我試過喺澳洲、瑞士、德國同荷蘭租單車踩，有次仲踩到去德國人裸泳嘅內陸湖，男女老幼全部都冇着衫，蔚為奇觀，不過我就勁尷尬，完全唔敢望，呢次經驗真係好難忘！」