小小So早排去一個時裝店開幕活動，見有唔少明星去捧場，大會就安排啲嘉賓喺簽名板影相，但就畀我睇到一幕「慘情記」。當時艾粒成員Donald同Krusty前成員女友阿Jan（張詠恩）到場，因阿Jan已轉戰幕後做公關，所以就冇同Donald企埋畀記者影相，不過現場有「口痕友」好唔客氣咁話：「合照啦！做乜唔合照呀？」搞到Donald一臉尷尬，對方冇停嘴再嚟一句：「嚟得都係博見報㗎啦！扮晒嘢！」
嘩！小小So身為路人甲聽到都覺得好難聽，好彩Donald同阿Jan EQ相當高，畀「口痕友」鬧住都頂硬上「合照」。以為影完相對方會收聲啦！點知佢繼續咬住唔放，仲大聲話：「咪又係要合照，搞咁多嘢，不知所謂！」小小So目擊整個過程都戥Donald同阿Jan委屈，唔通唔係乜嘢大明星就要忍受呢啲冷言冷語？嗰個人真係連少少基本嘅尊重都冇！