當年遠征台灣的七小福，曾有幸踏足總統府演出，元彪仍記得贏盡掌聲的片段：「我哋去台灣嘅時候係69年，嗰陣時當地有好多京劇嘅人才，所以佢哋覺得我哋香港啲戲班係未到家嘅！不過我哋七小福去台灣做兩日戲就場場爆滿，我哋廿幾個師兄弟做戲，做到台上好似有五十幾人咁！睇到班觀眾拍晒手掌，仲有人打爛窗門都要『裝』入嚟睇我哋。」身手了得兼活力十足得像有三頭六臂，二十多人可做出如五、六十人的威勢，難怪令觀眾瞠目結舌，驚喜萬分，為香港戲班打出漂亮一仗。

徒弟聲名響四方

原來，七小福滿師後仍要為師傅効力一年，收入則全歸師傅所有，以報答教導及栽培之恩。由於戲班吃得開，這年間常有機會出埠表演，比如遠赴泰國做潮州戲亦令他們印象難忘。當年也是潮州戲班底之一的元菊說：「『幫師』嗰年我去咗泰國做潮州戲，除咗我之外，唔少師兄弟好似成龍、元彪『幫師』嘅時候都喺泰國搵食㗎！」

除了揚威東南亞，他們更是聲名遠播，連在美國亦享負盛名。1973年他們應邀到彼邦表演，可惜遇上前所未有的波折，沉重得一下子將七小福打得散班，真可說是造物弄人！

師傅遭逢滑鐵盧

無奈散班，于師傅自感有愧於心，決永遠留在美國，直至辭世前只曾回港一次。當年隨團的二師兄元泰說：「師傅去美國係想還心願，想將京劇發揚光大。我哋喺美國都好受歡迎，場場爆滿㗎！最後一場喺羅省山頂演出，點知個老闆因為經濟出現問題，靜雞雞走佬，搞到成班人好徬徨，後來先知道原來佢拖咗師傅成年數。受到打擊嘅師傅好落泊，經常唉聲嘆氣，仲決定以後唔再做京劇。佢當時決定同師母一齊留喺美國，以後都唔返香港，可能係過唔到自己嗰關啦！」

何謂天堂與地獄，于師傅感受比任何人都要深。原本七小福有望揚名天下，誰想到竟落泊到望天打卦，「倉卒歲月，世事如棋」。一下子由天堂跌落地獄，能不令人慨嘆……