形象健康嘅方力申，早排成日喺電視機叫大家「日日做運動身體好」，加上佢前香港泳隊代表嘅身份，好多人都覺得小方簡直等於「健康」兩個字。我小小So就話小方實情係「孱仔方」嚟㗎！唔係我小小So作㗎！小方自己都係咁講！事緣，早排小小So唔知係咪着得高踭鞋多，搞到條腰骨「赤赤痛」，有次同小方傾偈，佢即刻介紹咗幾個醫師畀我！
小 方：以前做運動員成日都會受傷，所以識落好多醫生朋友！
小小So：咁都得？
小 方：係呀！我成日睇吓呢個醫生，又試吓嗰個醫生，我閒閒哋有十幾廿張醫生卡片！
小小So：咁腰骨痛有咩好介紹先？
小 方：針灸吖！針灸嘅醫師我都有四、五個可以介紹喎！
小小So：嘩，咁多？
小 方：係呀！我之前整親條腰，之後又整到手，啲朋友都話我係玻璃人㗎！整傷呢方面，我真係好有經驗㗎！
睇小方講自己啲病歷講到好似數戰績咁，小小So就愈聽愈心痛，哎呀！小方，你要錫住自己個Body先得㗎！