近年人氣急升嘅王祖藍，除咗拍劇、做大Show主持之外，仲簽埋英皇做埋歌手，忙到不得了，搞到愈嚟愈瘦，小小So都慘不忍睹！最近佢仲拍埋電影做男主角，不斷宣傳同做訪問，就連錢嘉樂都笑佢：「人哋做男主角嘛！」搞到向來謙虛嘅祖藍勁尷尬！之前，祖藍擔任林峯演唱會嘉賓，氹得啲觀眾勁開心！
小小So：你又喺度搶風頭！
祖 藍：梗唔係啦！林峯嘅風頭點搶呀！我細妹同朋友都有去睇演唱會，佢哋話啲Fans都睇到喊晒！佢哋真係鍾意得林峯好緊要！
小小So：現場成幾萬人，咁你嗰晚上一上台，都望吸番一千幾百個Fans呀，係咪？
祖 藍：係就好呀！
小小So：話時話，唔該你唔好再瘦，依家有冇100磅呀？
祖 藍：我都唔想咁瘦(口架)！