唐寧說：「因為我住喺村屋，人情味會濃啲，隔籬鄰舍大家都好似朋友甚至親人咁！有困難一定會互相幫忙。有次有個鄰居隻大唐狗半夜整親條腰，因為個主人係女仔，唔夠力抱隻狗去睇獸醫，眼定定咁睇住愛犬好痛苦咁瞓喺地下，佢急到標眼水之餘，惟有打電話求救。我哋成班人一收到Call就即刻上去幫手，就連一個搬走咗嘅鄰居都即刻飛車過嚟，最後我哋就合力將隻大唐狗送咗去睇獸醫。當時大家都唔理儀容，着晒街坊裝咁，諗番起個場面真係好感動。」

唐寧與愛犬豆豆親吻。

每有閒暇，唐寧都和愛犬一同跑步和逛公園。