本報昨日獨家披露同門好姊妹胡心諾（Rainbow）和周凱盈（Monique）齊齊輟學，Rainbow前日回應時強調自己是主動退學，又力指退學原因是要與好姊妹Monique共同進退。正當Rainbow以為可以瞞天過海之際，想不到事件旋即有新進展，令Rainbow大話妹現形！
玫瑰崗學校昨日書面回覆本報，表示「周凱盈於2009年5月27日在被罰停課後拒絕回校上課，由其父親代她提出自願退學申請……胡心諾於2009年5月21日因觸犯校規被學校開除。」根據校方回覆，Rainbow根本比Monique更早退學，故Rainbow自稱的退學原因根本不成立，她並非主動提出退學申請，反而是因觸犯校規而遭校方開除，足證Rainbow大話連篇！至於Rainbow表示已完成中四學程，因校方回覆指她於5月21日已遭開除，照計應未能趕及完成中四課程考試，亦再次證實Rainbow回應時撒謊。另校方亦澄清兩人並非該校中學部的學生，只於商科部中四級就讀，並強調「不會再回應有關該二位學生的進一步查詢」。
以為收警告信
對於大話遭連番踢爆，本報昨日致電Rainbow經理人Admond求證，Admond表示因事件涉及Rainbow私事，所以不便多作評論。過了約一小時後，Rainbow才致電回覆記者，她明顯有備而來，但解畫時錯漏百出，兼且數度嚇至口窒窒！
R：Rainbow 記：記者
記：學校話你被開除，點解你之前話係因為同Monique共同進退先決定主動退學？
R：因為我之前聽過Monique講，話佢想同屋企人商量退學，之後學校封信就寄咗嚟屋企。因為我哋冇固定拆信，所以遲咗幾日先睇，封信主要話呢間學校唔適合我，希望我轉校，因為係英文信，所以我冇睇晒，跟住媽咪就幫我打返學校話要退學。
記：你嘅意思係話畀學校開除之後，你都唔知？
R：封信淨係話我唔適合，我以為係警告信，所以無為意。
記：學校話你觸犯校規喎？
R：……可能因為我比一般同學多請假，又請病假、又請事假，工作時間同學業又平衡唔到。
記：請假太多都算觸犯校規？
R：係……
記：點解你尋日咁肯定自己係遲過Monique退學？
R：……我以為佢已經退咗學。
５月已冇書讀
記：擔唔擔心畀人話係大話精？
R：都擔心㗎！其實件事係學校同我哋之間有誤會，佢哋寄信過嚟，但我又唔係成日收信喎！
記：你之前話你完成晒成個中四課程，但你5月21日就冇讀，應該完成唔到㗎？
R：……咁啲書教晒，都差唔多完啦！係咯……
記：即係你感覺上覺得個學期完咗？
R：咁啲書教晒，又咁啱Monique話走，咪咩咯……都係咁啦！
記：咁你有冇考試？
R：冇考試。
記：你屋企人對呢件事有咩反應？
R：佢哋覺得我返夜校適合啲，呀！我依家都有進修演技同唱歌。
至於同是輟學的Monique，其電話至截稿前仍無人接聽。