以前睇報紙見到梁漢文（Edmond）蒲，都會「劈」到一塌糊塗，唔係醉到跌落垃圾堆，就係語無倫次發噏風，小小So戥佢可惜！好在Edmond成家立室之後，成個人生性晒，小小So都忍唔住要讚佢兩句！
小小So：結婚之後係咪戒咗蒲？
Edmond：真係冇！唔係結婚後，一早已經斷咗4、5年啦！
小小So：修心養性？
Edmond：唔係，都蒲咗10幾年啦！由21、2歲入行出嚟蒲，當時精力充沛，雖然每日開工不停做，但一收工沖緊涼已經打電話，約定班Friend邊度等，一係篤波，一係飲嘢，一直蒲到31、2歲，喺4、5年前已經覺得好厭倦！
小小So：最近仲有冇去飲酒？
Edmond：之前朋友生日喺酒吧包場慶祝，自己上到去坐咗個幾鐘，已經覺得唔得！好嘈、好唔慣，都唔知做乜，不如返屋企啦！其實都唔關結婚事，呢幾年都係咁，收工就返屋企上網同睇電視，想有自己嘅生活。