犯禁惹禍上身

自小飽受薰陶的七小福，還記得當年在荔園的後門，長期擺放着一尊人稱「祖師爺」的神像，這尊神像的身份相當特別，當需要演出一些涉及嬰孩戲時，祖師爺便會化身劇中嬰孩，由飾演母親的女徒弟抱着當「道具」演出，假如祖師爺不用友情客串的話，則會置身後台保佑演出順利；由於神聖不可侵犯，所以于師傅頒下禁令，除了演出，平日絕不能亂碰祖師爺，否則隨時會有意外發生。

一班師兄弟中，元華向來是一等一的頑童代表，膽敢對祖師爺作出不敬行為，實非他莫屬。當年目擊元華對祖師爺手多多的元彬，至今對元華的「劣行」仍難以忘懷：「嗰次元華唔知貪玩定點，將祖師爺啲鬚放入祖師爺個鼻度又掹番出嚟，跟住嗰日就死火喇！唔知點解個個都有啲小出錯，夜晚師傅就喺後台大發雷霆，問我哋究竟發生乜嘢事，跟住有人就篤咗元華出嚟，話佢整祖師爺啲鬚，嗰次就大鑊喇！畀師傅打到吖……」

斬雞手起刀落

除了祖師爺不能亂碰外，由於京劇是中國傳統戲曲藝術，故此每年收爐及新春開鑼前都有特定儀式要進行，以確保年中順風順水、無風無浪。心思較縝密的女弟子如元菊，對當年的習俗仍記得一清二楚：「以前我哋收爐之前，會成班一齊喺個台度係咁跳，每一個角落都跳勻，代表我哋今年完結喇！喺年初二開台之前，我哋會有個儀式，由二師兄元泰負責拎住隻雞，之後大師兄洪金寶就負責斬雞頭，跟住將啲雞血灑滿個場，隔籬仲有啲人扮青龍、白虎，不過我就唔記得邊個扮喇！總之年年都係咁嘅。其實斬雞頭好大壓力㗎！因為一定要一刀切，如果一刀斬唔斷個雞頭，就代表唔吉利。」

話說回來，哪個小孩不頑皮！在台下顛三倒四的七小福，台上的演出卻是貨真價實的，絕不欺場。今天常說的舞台王者，都是以「舞」論英雄，但文武兼備，唱做唸打皆觸動人心的七小福，亦堪稱荔園舞台的小小王者。