娛樂圈除咗米雪擁有「青春嘅秘密」之外，其實唔少藝人都有駐顏秘方。好似啲皮膚永遠都好似BB咁滑溜嘅溫碧霞（Irene）咁，佢嗰日就彈咗條養顏秘方畀小小So聽，就係每隔十日就燉啲冬蟲草嚟進補吓，Irene仲話Keep住呢個食療，唔單止睇落永遠都咁後生，而且仲可對抗豬流感（H1N1甲型流感）有幫助添！
小小So：查實你點解可以咁多年個樣都冇變嘅？
Irene：好簡單，咪食冬蟲草囉！
小小So：好貴(口架)喎！成幾千蚊一両(口架)！
Irene：其實唔係你諗到咁貴嘅，一両靚嘅冬蟲草雖然要幾千蚊，但一両已經有成一百條，而冬蟲草食療法只需每隔十日食一次就OK，每次分量五至十條左右，就算每次燉十條嚟食，一両都食到三個月左右，平均計落每個月都唔使一千蚊。講真，買啲靚啲嘅護膚品都唔止呢個價錢啦！而且冬蟲草唔單止有養顏功效，仲可以強身健體，又唔驚有副作用，計我話就一啲都唔貴喇！
小小So：咁點樣嘅冬蟲草先叫靚呢？
Irene：條尾愈長愈好，仲要唔好斷開咗，咁就最靚喇！另外，千祈唔好買啲太深色嘅，因為有可能加咗染劑落去㗎！