初期把守這重要一關的重任，大多落在最年長、十三歲才加入于師傅門下的元斌身上，元斌說：「我最大個，身材最高大嘛！所以多數都係由我負責看管後台。不過喺後台都幾慘㗎！個個返晒去學校得番我一個喺度過夜，仲要係瞓喺個好細嘅箱上面，要屈住隻腳先瞓到上去，瞓覺嘅時候連身都轉唔到㗎！」

挑釁馬騮偷香蕉

不過他們向來詭計多端，無論去到哪裏總會自得其樂，又怎會整晚在後台坐定定呢！在荔園演出不久，他們便對這地方瞭如指掌，並在此戰場展開吃喝玩樂的愉快生活，元斌再細細道來：「嗰陣時成日夜晚都會去偷龜蛋食，啲龜蛋好似乒乓波咁㗎！我哋仲會偷馬騮啲香蕉食，搞到啲馬騮都認得我哋，每次行過，啲馬騮都會向住我哋叫，因為知道我哋同佢哋爭食嘛！」不過元斌學藝只短短數年，離開後，于師傅多委派元奎看管。

每到上台演出前，他們便會分工合作，將戲服與道具準備好。元彬說：「當時我主力負責管靴，唔好以為好容易呀！因為每個角色着嘅靴都唔同，我哋淨係靴都有一百七十幾對。而元奎負責刀槍，元泰幫手抬箱，元秋就負責準備化妝用具。」

台前幕後通天曉

認真地訓練，演戲自是一絲不苟，每次演出前他們必須背熟劇本及記好台位，還要肩負看管後台重任，可以說忙到冇時停。不過，這也是日後名成利就的基石，元彬說：「我哋嗰時因為要管埋服裝同道具，所以京劇人物應該着咩衫、用咩兵器，我哋都一清二楚，好似包公一定係黑衫黑褲，曹操就係着全白。唔單止咁，就連啲人物幾時開始有鬚都知，所以滿師出嚟拍電影，啲導演好鍾意用我哋七小福(口架)！」

雖然同時兼顧台前幕後工作十分辛苦，但這也是一眾元家班「周身刀，張張利」的主因。無論演技、動作以至製作及拍攝有關知識，全都難不倒他們，若不是從小就吃苦，哪知苦盡甘來的滋味是這樣甜！

不過少年不知愁滋味，無論甜苦只知好奇不好奇。原來在道具中有一件寶，不僅守護着這班小朋友，更是神聖不可侵犯……